يېقىندا، Coal India شىركىتى ئېلېكترونلۇق خەت ئارقىلىق ھىندىستان ھۆكۈمىتىنىڭ ئىمپورت قىلىش ئورنىغا يەرلىك كۆمۈر ئىشلەپچىقىرىشنى ئاشۇرۇش سىياسىتىنى ئىلگىرى سۈرۈش ئۈچۈن، شىركەتنىڭ ئومۇمىي مەبلەغ سېلىش سوممىسى 473 مىليارد رۇپىيە بولغان 32 كانچىلىق تۈرىنى تەستىقلىغانلىقىنى ئېلان قىلدى.
ھىندىستان كۆمۈر شىركىتى بۇ قېتىم تەستىقلانغان 32 تۈرنىڭ ئىچىدە 24 مەۋجۇت تۈر ۋە 8 يېڭى تۈر بارلىقىنى بىلدۈردى. بۇ كۆمۈر كانلىرىنىڭ ئەڭ يۇقىرى ئىشلەپچىقىرىش ئىقتىدارى 193 مىليون توننىغا يېتىشى مۆلچەرلەنمەكتە. بۇ تۈر 2023-يىلى 4-ئايدا ئىشقا كىرىشتۈرۈلۈشى پىلانلانغان بولۇپ، ئىشقا كىرىشتۈرۈلگەندىن كېيىن يىللىق ئىشلەپچىقىرىش مىقدارى 81 مىليون توننىغا يېتىدۇ.
ھىندىستان كۆمۈر شىركىتىنىڭ ئىشلەپچىقىرىش مىقدارى ھىندىستان ئومۇمىي ئىشلەپچىقىرىش مىقدارىنىڭ %80 تىن كۆپرەكىنى ئىگىلەيدۇ. بۇ شىركەت 2023-24-مالىيە يىلىدا 1 مىليارد توننا كۆمۈر ئىشلەپچىقىرىشقا ئېرىشىشنى مەقسەت قىلىدۇ.
ھىندىستان ئىقتىسادى يېڭى تاج ئۆپكە ياللۇغى يۇقۇمىدىن ئەسلىگە كېلىۋاتقاندا، ھىندىستان كۆمۈر شىركىتى كۆمۈر ئېھتىياجىنىڭ ئەسلىگە كېلىشىگە ئۈمىد باغلىماقتا. ئۆتكەن ئايدا، ھىندىستان كۆمۈر شىركىتىنىڭ رەئىسى پرامود ئاگارۋال، ياز پەسلى يېقىنلاشقاندا، سانائەت ئىستېمالىدىن باشقا، توك ئېھتىياجىنىمۇ قوزغىتىدىغانلىقىنى، شۇنىڭ بىلەن ئېلېكتىر ئىستانسىلىرىنىڭ كۈندىلىك ئىستېمالنى ئاشۇرۇشى ۋە زاپاس مىقدارىنى ئازايتىشىغا تۈرتكە بولىدىغانلىقىنى بىلدۈردى.
ھىندىستاننىڭ mjunction مۇلازىمەت سۇپىسى سانلىق مەلۇماتلىرىدىن مەلۇم بولۇشىچە، بۇ مالىيە يىلىنىڭ دەسلەپكى 10 ئېيىدا (2020-يىلى 4-ئايدىن 2021-يىلى 1-ئايغىچە) ھىندىستاننىڭ كۆمۈر ئىمپورت مىقدارى 180 مىليون 840 مىڭ توننا بولۇپ، ئۆتكەن يىلنىڭ ئوخشاش مەزگىلىدىكى 204 مىليون 550 مىڭ توننىدىن %11.59 ئازايغان. ئىمپورت قىلىنغان كۆمۈرگە تايىنىشنى ئازايتىش ئۈچۈن، ئىچكى ئىشلەپچىقىرىشنى ئاشۇرۇش مۇھىم ئەھمىيەتكە ئىگە.
بۇنىڭدىن باشقا، ھىندىستان كۆمۈر شىركىتى كۆمۈرنىڭ راۋان ئېكسپورتىنى قوللاش ئۈچۈن بۇ تۈرنىڭ ئەتراپىدىكى يېڭى تۆمۈر يول ۋە قاتناش ئۇل ئەسلىھەلىرىگە مەبلەغ سالغانلىقىنى ئېلان قىلدى.